කිමුන් ආතාට උදවු කිරීමට අතිමානුෂික පොරවල්වලට අවස්ථාවක්

කිමුන් ආතාගෙ වාර්තාව ගැන උනන්දුවෙන උදවිය මූලික වසයෙං ගත්තාම ගොඩවල් දෙකකට දාන්න පුළුවංය කියන එකයි මගේ නං කල්පනාව. එක කට්ටියක් තමා කිමුන් ආතගෙ වාර්තාව එලියට දානකං දතකට මැදගෙන බලාහිටපු අතිමානුෂික පොරවල් සහ පොරියවල්. ඒ කට්ටිය දැං පස්වනක් පිරීතියෙං පිනා ගිහිං දමාගෙන ලියනවා වාර්තාවෙ වටිනකම ගැනයි ඒකෙ ජාතකේ හොඳකම ගැනයි ඒකට ප්‍රතිචාර දක්වන්ට ඕන(රාජතාන්ත්‍රික) ක්‍රමේ ගැනයි ආදී වසයෙං.

අනිත් පිරිස කිමුන් ආතට අකමැති උන්දැගෙ වාර්තාවට විරුද්ධ රාජතාන්ත්‍රික වැඩකටයුතු ගැන දැනුමක් තේරුමක් ඇති අර පඬිතුමාලට වගේ බුද්දිමහිමයත් නැති හුදී ජනතාව. මං දැක්ක ඒ වගේ ජනතාවගෙන් හුපදේසක කමිටුවේ වාර්තාවට විරුද්දව පෙත්සමක් හදන්න ආණ්ඩුව වැඩ කරනවා. මෙතෙන්දි ආණ්ඩුව ජනතාවගේ බුද්දියට ආමන්ත්‍රණය නොකර හැඟීම් අවුස්සල අස්සං හොරාගන්නවා වගේ කතාවක් තමා "පාපිසි" පඬිතුමා එහෙම කියල තිබුණෙ. මොනව කරන්නද ඉතින් ජනතාවට ඔහේලට වාගෙ බුහ්දියක් නෑ නෙව? නැති බුහ්දියට කොහොමෙයි ආමන්ත්‍රණේ කොරන්නෙ?

ඒ කොයි හැටි වෙතත් ඊනියා උපදේසක කමිටු වාර්තාව සම්බන්දයෙං ප්‍රතිචාර දැක්වීමේ අමනකම ආණ්ඩුව නොකරාවි කියන එක තමා මගේ නං බලාපොරොත්තුව. බොරු ජනවාර්ගික ප්‍රශ්නයට විසඳුම් දෙන්නෙ නැතුව ඒ පාරෙන් යන්න පුළුවන් කමක් නැති බවයි පේන්නෙ.

පඬිතුමාලට අනුව මෙතෙන්දි ත්‍රස්තවාදී විසේසඥ මහචාරියතුමා වගේ උදවිය විතරයි කියනවා රාජතාන්ත්‍රික ක්‍රමේට වැඩ කරන්නෙ. උන්නැහෙ මේක වැරදියි කියල ආතට ලියුම් ලියනව වගේ පේන්නෙ. මගේ නං අදහස උන්නැහෙල මේ මලදානෙට විරුද්දව කිමුන් ආතට ලියනවාට වඩා හොඳයි ඒ ලියන අත කටේ දාල හයියෙං හපාගන්න එක. අර නලින් මහත්තය කියල තිබුණ අපිත් එක්ක හිතවත්කං තියෙන රටවල් වලට මේ අවනඩුව කියන එක තමයි හරි වැඩේ කියල. අන්න එහෙම දෙයක්වත් කරා නං දෙලොවටම හොඳයි කියන එකයි මටත් හිතෙන්නෙ.

දැං එන්නෙ මේ කතාවෙ දුක හිතෙන හරියට. වාර්තාව ඇවිල්ල ඉතිං අපක්සපාතී, මධ්‍යස්ත, වෘත්තීය (හරියට කොටිරාජාවාහිනියෙ නිවුස් වගේ) එකක් නිසා මේකෙ කොටි විසින් කොරාපු මානව හිමිකං කඩකිරීමේ වැඩ එහෙමත් හරි හරියට තියෙනවා නෙව.

හැබැයි කිමුන් ආත අමාරුවෙ වැටිලයි ඉන්නෙ වාර්තාවෙ පිටපතක් යවන්න කොටිංගෙන් වගකිවයුත්තෙක් හොයාගන්ට බැරුව. ඇයි ඉතිං පහුගිය තිස් අවුරුද්දක් විතර තිස්සෙ ඔන්න වාර්තා හැදුවා නං නිකමට හරි සොල්හයිං උන්නැහැ අතේ යවන්ට තිබුණා නෙව කොටින්ට. දැං වාර්තාව කොච්චර අපක්සපාතී විදියට හැදුවත් විදියක් නෑ යවන්ට කොටින්ට මොකද කොටි නැති නිසා. බලහල්ලකො ඉතිං කිමුන් ආතටත් වෙන වැඩ!

ඇමරිකාවෙනුත් උන්නැහෙට බලපෑම්ලු කොහොමහරි කොටි ටිකක් හොයල වාර්තාව යවන්ටය කියල. බ්ලේක් උන්නැහෙ ඊයෙ පෙරේද තකහනියක් දුක සැප බලල යන්ට ආපු වෙලේ මේ කාරණේ ගැන කණස්සල්ල පලකොරලත් තියෙනවලු.

කේපීයි කරුණායි ඉන්න නිසා එව්වටත් වගකියන්න ඕන ආණ්ඩුවමයි කියල ෆොන්සේකගෙ මිත්‍රයො කිය කිය යනවාලු. ඩයස්පොරවල් කියනවාලු වාර්තාව දෙන්න බැරි වෙන්න කොටි මරල දැම්ම නිසා ඒ චෝදනා ටිකටත් ආණ්ඩුවම වගකියන්න ඕනය කියල.

ඉතිං මේවගේ අමාරු තත්වයකදි (මුන්නැහෙ එහෙම කඩේ යන කෙනෙක් නෙවෙයි අරය මෙයා කිව්වට) කිමුන් ආතට උදවු කරන එක රාජතාන්ත්‍රික වැඩ තේරෙන අපේ පඬිතුමාලගෙ යුතුකම. කොහොමහරි කොටියෙක් දෙන්නෙක් හොයල දෙන්න හොඳේ?